Mga pabrika sa Minglanilla ipasusi ang toxic chemicals

Ang Department of Environment and Natural Resources (DENR)-7 ug ang municipal health offices giawhag sa hunta probinsyal nga monitoron ang   mga pabrika diha sa lungsod sa Minglanilla ug kasikbit nga siyudad sa ilang gipanglabay nga basura nga gisudlan og toxic chemicals aron malikayan ang “fish kill” .

Si Bokal Juan Bolo  miduso og resolusyon nunot sa nahitabong fish kill sa milabay’ng duha ka semana  sa Sta. Fe Cebu.

Matud ni Bolo ang mga isda ug mga kinsahon maoy kasagaran mapalit sa katawhan sa inadlaw-adlaw nga pagkaon.

Nagkanayon si Bolo ang paglabay sa mga basura sa dili hustong lugar nga dunay sulod nga toxic elements usa sa mga posibleng hinungdan sa pagpangamatay sa mga isda ug kinhason.

Aron malikayan ang susamang problema miingon ang bokal nga trabaho sa DENR-7 ug municipal health offices ang pag-monitor niining mga pabrika diha sa Minglanilla ug kasikbit nga mga lungsod ug siyudad nga magpataka na lang og labay sa ilang mga basura nga gisudlan og toxic chemicals.

Ang pag-monitor  sa hustong pamaagi paglabay sa mga basura sa mga pabrika  ilabina sa kemikal dili gyud makatampo og limpyo nga kinaiyahan ug ingon man maayong produkto, matud pa ni Bolo.