Naghikog patay ang usa ka mag-uuma human sa ilang panaglalis tali sa iyang asawa sa barangay Bugtong, Cawayan lungsod sa Barili niadtong milabay’ng Sabado sa hapon.
Ang biktima naila sa pangalan nga si Calixto Ripdos Sr., 53 anyos, minyom usa ka mag-uuma.
Gibutyag ni PO3 Job Sarvida sa Barili Police Station dihang nahinabi sa Banat News nianang alas 2:00 sa hapon niadtong Sabado naglalis ang biktima ug ang asawa niini ug human niana nagdali nga nilakaw paingon sa umahan ang biktima aron sa pagpanguha og kumpay aron ipakaon sa baka niini.
Apan dihang gi-apas kini sa iyang 10 anyos nga anak nga si August Ripdos, nakit-an nalang kini nga nagbitay sulod sa iyang payag daplin sa umahan nga patay na ug dunay nylon nga gihigot sa liog.
Ang anak babaye sa biktima nga si Rosalie Alcos, 32 anyos, minyo, mao nay nagpahibalo sa kapulisan sa pagpakamatay sa biktima.
Gisalikway sa kapulisan ang posibilidad nga dunay foul play ang maong kremin tungod kay walay gikaaway ang biktima sa ilang lugar ug personal nga problema sa pamilya ang nakita nga motibo niini sa pagpakamatay.