Baho nga tubig miawas sa sitio sa Talisay

Kapitan sa Barangay Lagtang, dakbayan sa Talisay mipasangil nga ang mga napundong tubig diha sa kanal sa Santa Lucia subdivision  mopaingon diha sa sitio Anadol sa maong barangay.

Ang mga residente sa maong lugar  mipasangil usab nga ang maong tubig nga mapundo gikan sa usa ka establisamento diha sa ilang lugar nga manghugas og botelya  magpabuhagay sa baho nga tubig  hinugas.

Si Kapitan Celiapo  Cabuenas sa pakighinabi  sa Banat News kagahapon mihimakak sa pasangil batok kaniya nga wala niya hatagi og pagtagad ang reklamo sa sobra 70 ka residente sa nahisgutang sitio.

Matud ni Cabuenas nga gipasusi dayon niya sa  City  Health ang nahisgutang establisamento apan gikataho nga ang city health sa Talisay walay nakitang kalapasan nga nahimo  sa maong establisamento.

Kahinumduman nga ang maong mga residente   miduso og reklamo ngadto kang Cabuenas kabahin sa maong problema tungod kay ang tubig nga baho matanggong man diha sa ilang lugar nga nakahatag og kadaot sa panglawas ilabi na ngadto sa mga bata ug posible usab nga puy-an  og mga lamok nga nagdala og dengue.

Apan si Cabuenas mipasangil nga ang nahisgutang tubig nga baho naggikan  sa kanal sa Santa Lucia.

Gibutyag niini nga ang Santa Catalina Subdivision nga nahimutang ubos nga bahin sa Santa Lucia adto magpabuhagay sa ilang hugaw nga tubig sa kanal sa Santa Lucia.

Ang Santa Lucia   mi-condemn sa ilang kanal diin ang tubig niini nagpundo ug moawas ngadto sa sitio Anadol.

Matud ni Cabuenas nga ang Santa Lucia adunay gibuhat nga kanal nga paingon molusot sa sapa sa Mananga apan wala pa kini mahuman ug iyang gimanduan ang tagdumala sa maong subdivision nga ipahuman og dali ang maong kanal aron masulbad na ang problema diha sa sitio Anadol. (Brenda D. Batuto)