Mabdos, bata dasmaga'g patrol car

Upat ka tawo ang naangol apil na ang usa ka mabdos ug 2-anyos nga batang babaye  sa dihang nawad-an og preno ang patrol car nga gipanag-iya sa Regional Mobile Group (RMG) ug  mibangga sa usa ka tindahan didto sa barangay Daan Lungsod Tuburan niadtong Sabado sa alas 5:46 sa hapon.

Ang mga naangol naila nga sila si Annabelle Jerusalem, 23,  minyo ug usa ka mabdos, anak niining babaye nga si Marjorie, 2, Steward Labajo, 17 ug Teofilo Villanueva, 16, pulos mga molupyo sa Sitio Panas, barangay Daanlungsod sa nahisgutang lungsod.

Gibutyag ni SPO1 Carlo Canseko sa dihang nahinabi sa Banat News paingon nga mangompra sa lungsod ang maong patrol car sa RMG detachment nga nagbase sa barangay Kampoot nga gimaneho ni P01 Vaughn Ariola, 30, ulitawo sakop sa RMG nga nadestino sa maong lugar.

Sa inisyal nga imbestigasyon sa kapolisan sa Tuburan nasuta nga ang patrol car nga gimaneho ni P01 Ariola nakasugat kini og sakyanan nga kusog nga nagpadagan og mikawat sa center lane paghiabot sa maong dapit.

Aron paglikay sa disgrasya napugos sa pagpadaplin si P01 Ariola apan tungod sa kakusog sa dagan natapigas ang ligid niini sa aspalto nga karsada nga maoy hinungdan nga wala na mopaak ang break niini og gibangga na lang sa koral nga  milahos sa tindahan.

Matud ni SPO1 Canseko naatol nga  migawas sa tindahan gikan nga namalit si Annabelle  niadtong tungura nga nagkugos sa iyang 2-anyos nga anak hinungdan nga nabanggaan kini sa naghaguros nga patrol car.

Apil sa gidam-agan sa maong sakyanan ang duha ka batan-ong lalaki nga naglingkod lingkod lang sa tindahan.

Si Annabelle nakaangkon ug samad og pangos sa iyang tuhod, kalawasan ug samad sa ulo,samtang ang dos anyos niyang anak nasamad sa agtang, samtang ang duha ka lalaki nga batan-on mga pangos ug bun-og sa tuhod ug kamot ang naangkon niini.

Matud ni SPO1 Canseko nabalitaan niini gikan sa pamilya nga namatay gyud ang dos anyos nga bata nga gidali pagdala sa usa sa mga tambalanan dinhi sa dakbayan.

Sa inisyal nga imbestigasyon sa kapolisan nasuta nga ang pagka palyar sa break maoy hinungdan nga wala na makakontrol si PO1 Ariola sa sakyanan ug nabangga kini sa koral nga milahos sa tindahan.