Gibadlong kay namuso namusil

Tulo ang naangol apil na ang ama-ama niini ug igsuon sa pagpamusil sa batan-ong suspetsado nga nasuko dihang gibadlong ug gikasab-an tungod sa pagsige og pamuso sa asawa sa igsuon niini didto sa Sitio Lagang, barangay Bolinawan, siyudad sa Carcar kagahapon sa alas 8:15 sa buntag.

Ang suspetsado naila nga si Zenaido Abadilla, 26, molupyo sa nahisgutang lugar,samtang ang tulo ka biktima naglakip sa iyang stepfather nga si Diomedes Baradan Sr, 52, minyo, anak niining si Diomedes Baradan Jr., 24, minyo ug ang asawa niini nga si Janice, 24, pulos mga molupyo sa maong lugar.

Matud ni PO2 Democrito Alcover sa dihang nahinabi sa Banat News sa wala pa ang maong panghitabo gikasab-an ni Diomedes Sr. ang   anak-anak nga suspek tungod kay mangunay kini sa pagpamuso sa asawa sa iyang anak.

Sigun sa report nga nahipos ang suspek anak kini sa pagka dalaga sa asawa ni Diomedes Sr.

Apan giingon nga giseryoso og maayo sa suspek ang pagkasaba kaniya sa iyang ama-ama hinungdan nga paglabay sa pipila ka minutos milakaw kini og pagbalik gipamusil ang mga biktima.

Si Diomedes Sr. nakaangkon og samad pinusilan sa walang bahin sa iyang paa, samtang si Janice naka-angkon og samad pinusilan nga mitipsing sa iyang tampihak ingon man si Diomedes Jr. nga naka-angkon og samad pinusilan sa iyang bukton.

Ang suspetsado daling misibat paingon sa bukirang bahin sa siyudad sa Carcar samtang ang mga biktima gidali pagdala sa tambalanan sa maong siyudad apan gipabalhin kini sa Vicente Sotto Memorial Medical Center (VSMMC).