Gamay ray nikuyog sa protesta vs. GMA

Gamay ra kaayong mga militante ang mipakita sa gilusad nga rally kagahapon dinhi sa dakbayan sa Sugbu agi’g panawagan pagsuporta sa ZTE Broadband deal state witness Rodulfo Lozada ug ang pagpalagpot kang Presidente Gloria Arroyo tungod sa giingong kurapsyon sa pangagamhanan niini.

Ang mga raliyistang nimartsa mao ang Akbayan, Sanlakas, Bayan Muna, Bayan ug uban pang sub-groups niini apan gamay ra kaayo ang nitumaw sumala pa sa kapolisan kumparar sa nangaging mga lihok protesta.

Sa atubangang bahin sa Police Regional Office-7 gibana-banang kapin ra sa 20 ka miyembro sa Sanlakas ang nagtapok diha sa ganghaan sa maong kampo.

Ang Sanlakas nanawagan sa pagpa-resign kang PNP Chief Director General Avelino Razon ug nagbitbit pa og effigy ni Razon nga nagpasangil nga usa kini ka bakakon.

Si Razon maoy usa sa gisabunan og maayo sa Senado kalabot sa pasangil nga pagsignit kang Lozada diha sa airport human kini maabot gikan sa Hongkong.

Gidudahang gituyo kini aron di gyud paadtuon si Lozada sa Senate committee hearing kabahin sa ZTE broadband deal tali sa gobiyerno ug sa maong kompanya sa China nga giingong ‘overprice.

Samtang diha sa dalan Colon atubangan sa usa ka dakong mall gibana-banang wala usab kaabot og 50 ka tao ang mitambong gikan sa grupo sa Bayan, Bayan Muna ug laing sub-groups.

Ang grupo mimartsa sa Malacañang sa Sugbu ug malinawong namauli pipila ka minutos ang nakalabay samtang duna say ecumenical prayer rally ang gilusad sa simbahan diha sa Fuente Osmeña Rotunda agi’g pangaliya nga mogawas ang kamatuuran sa maong isyu.