Kapt. Ocarol gipaubsan ang kaso

Gipa-ubsan sa homicide section sa kapolisan sa dakbayan sa Sugbo gikan sa physical injury ngadto sa slight physical injury ang kasong gipasaka batok kang Kapitan Romeo Ocarol sa Barangay Pasil niining dakbayan kinsa nakapusil sa usa sa mga residente sa iyang barangay sa milabay’ng adlaw.

Kini human nakita sa mga imbestigador sa kapolisan nga adunay mitigating circumstances atol sa maong insidente dihang napusilan ni Ocarol si Gregorio “Goryo” Abellana kinsa nakaangkon og samad sa walang tiil dihang gisalbahan sa kapitan.

Apan giklaro ni Cebu City Police Office Chief Patrocinio Comendador nga iyang gimanduan ang homicide section nga mo-coordinate sila sa Fire Arms and Explosive Security Service Group.

Kini aron pagsuta kun si kapitan Ocarol aduna ba kini permit to carry sa maong armas bisan og aduna kini lisensiya nga gihuptan sa ingon ila usab nga matimbang-timbang ang pagpasaka’g laing kaso batok niini.

Matud ni Comendador nga ilaha gyung pasakaan og laing kaso si Ocarol apan ila pa usab kining gitun-an gumikan kay adunay mga jurisprudence nga kun walay laing krimen nga mahimo ang kaso adto kini mo-absorb sa pagpaubos sa kaso.

Hinuon iyang giklaro nga magkinahanglan pa kini’g igong pagtuon sa pag-determinar sa posibleng laing kaso nga isang-at batok kang Kapitan Ocarol.

Sa nasayran nga si Ocarol nakapusil kang Abellana human sa ilang panaglalis dihang wala paapila sa kapitan ang biktima sa liga sa basketball gumikan sa pagkabadlungon niini.