LTO ug LTFRB maghiusa batok sa kolorum

Makigtambayayong ang Land Transportation Office (LTO-7) sa Land Transportation Franchising and Regulatory Board (LTFRB-7) sa tinguha niini nga bungkagon ang padayong operasyon sa mga kolorum nga sakyanan sama sa taxi ug PUJ dinhi sa Sugbu.

Gibutyag ni LTO-7 director Raul Aguillos dihang nahinabi sa Banat News nga mangita siya og paagi nga malingkuran nila ni LTFRB-7 director Romulo Bernardez aron magtambayayong sa pagsumpo sa mga kolorum nga sakyanan nga padayon sa ilang ilegal nga pagpamasahero dinhi sa dakbayan.

Gipasalig ni director Aguillos nga mopahigayon dayon ang ilang mga operatiba og anti-kolorum operation sama sa paglusad og mga check points sa kadalanan aron madakpan ang mga kolorum nga taxi.

Matud ni Aguillos bugtong gikinahanglan nila karon nga makakuha og kompletong listahan gikan sa LTFRB-7 sa mga legal ug rehistradong taxi ug PUJ aron maoy ilang basehan sa pagpahigayon og operasyon.

Iduso usab ni Aguillos atol sa ila unya nga paghinabi sa bag-ong director sa LTFRB-7 ang pagpahigayon og imbentaryo sa tanang mga lihitimo nga taxi ug PUJ nga nag-operate dinhi sa Sugbu aron mahibaw-an kadtong mga Kolorum.

Gipasabot ni Aguillos nga nahimo karong makaluluoy ang mga lihitimong taxi operators nga nagtinarong og bayad sa buhis apan gi-kompetensiyahan sa mga badlongong operators nga maoy nag-operate niining mga Colorum nga sakyanan.

Si director Bernardez una nang nipasalig nga bungkagon ang operasyon sa mga Colorum nga sakyanan sama sa taxi ug PUJ sa gihimo niining pagpamulong atol sa pag-asumir niini sa bag-ong posisyon niadtong Lunes.