Nagtinguha karon si Bise-Mayor Maria Luisa Loot nga idili na ang pagpatanum og tubo sa kaumahan sa lungsod sa Daanbantayan.
Kini gumikan sa pwerhesyo nga namugna sa maong matang sa industriya ngadto sa lungsod nga nakaapektar usab sa katawhan.
Si Loot nagdumili sa pagtagad sa reklamo sa katawhan labot sa abog gikan sa gisunog nga katubhan nga adto mosulod sa kabalayan ug nakamugna og kahugaw sa palibot.
Gipasabot ni Loot nga walay nakuha nga benepisyo ang lungsod gikan sa pagpananum og tubo.
Gawas sa buhis sa yuta sa mga nanag-iya niini, ang lungsod sa Daanbantayan wala magdawat og bahin sa kita sa mga tag-iya sa tubo nga nag-abang sa kayutaan ingon man sa mga produkto nga gigaling sa Bogo-Medellin Sugar Milling Corporation (Bomedco).
Gitumbok ni Loot nga ang trak nga magkarga sa tinapas nga tubo mao usab ang nakaguba sa kadalanan sa barangay lakip na ang aspaltadong kadalanan nga iya sa kagamhanan sa lalawigan sa Sugbu.
Ang pasangil ni Loot gidasonan sa mga reklamo nga gipadayag sa katawhan sa Bantay Radyo gikan sa mga kasikbit nga lungsod.
Ang aspaltadong dalan gikan sa Curva, Medellin padulong sa Daanbantayan ang grabe usab nga kadanglog panahon nga mag-uwan gumikan sa baga nga lapok nga dala sa ligid sa trak gikan sa katubohan.
Lakip sa ningreklamo ang katawhan sa Hagnaya, San Remegio gumikan sa abog gikan sa panghaw sa Bomedco nga moabot sa ilang lugar.
Gipasabot ni Loot nga ang dili niya pagtagad sa reklamo sa katawhan sa iyang lungsod gituyo aron nga ang katawhan na mismo ang masuko ngadto sa mga tag-iya sa katubohan.
Dugang pa ni Loot nga kun daghan ang mawagtangan sa ilang panginabuhi sa pagsalig sa tubo, dili usab mahimong isakripisyo ang ubang tawo nga apektado sa kadaut nga namugna sa maong industriya.