Nangawat og helmet gikumbikto

Gihukman sa korte nga mabilanggo sulod sa 15 ka tuig ang usa ka ex-convict ug pabayaron og P300 mil nga multa human kini mapamatud-ing sad-an sa paghupot og tulo ka linikit nga marijuana duha ka tuig na ang milabay.

 Si Regional Trial Court (RTC) Judge Gabriel Ingles nagkanayon nga ang mga linikit nga marijuana nga nakuha gikan sa posesyon ni Rodulfo T. Catalona ang magamit batok sa akusado tungod kay na-recover kini sa gipahigayong body search human siya masikop tungod sa pagpangawat og helmet sa motorsiklo.

Ang mga tanod sa Barangay Kalubihan nga sila si Raul Perlostratos ug Danilo Binolo-ac kinsa maoy nakasikop kang Catalona ang metistigos ngadto sa korte batok sa akusado.

Si Catalona ang nasikop sa maong mga tanod niadtong Hunyo 24, 2006 human siya nangawat sa crash helmet sa usa ka motorsiklo nga giparada diha sa dalan Leon Kilat niining dakbayan.

Ang 38-anyos nga si Catalona miangkon nga iyang gikawat ang nahisgutang helmet apan wala niini angkona nga iyaha ang mga linikit nga marijuana ug matud  niini nga na-recover kini gikan sa iyang gikawat nga head gear.

Apan ang mga tanod miinsister nga ang maong mga marijuana nakuha nila gikan sa pitaka sa akusado.

Base sa record sa korte nga si Catalona ang nasikop na kaniadto ug nakombikto kini sa kasong robbery.

Si Ingles mihatag og  pabor sa mga testimoniya sa duha ka tanod human mahibaw-i nga si Catalona ang nasikop na kaniadto ug nakombikto pa gyud tungod sa pagpangawat ug ang  pag-angkon  niini sa pagkawat sa helmet.