Hotlist sa PASG wa ikaalarma ni Tomas

Wala maalarma si Mayor Tomas Osmeña labot sa gikatahong pagpayuhot og mga luhong sakyanan dinhi sa Sugbu.

Labing minos 29 ka personalidad dinhi sa Sugbu ang anaa sa “hot list” sa Philippine Anti-Smuggling Group (PASG-7) nga giingong nanag-iya og kwestiyonabling luxury vehicle.

Ang listahan gikatahong giduso na sa PASG-7 ngadto sa Committee on Good Government sa Ubos Balay Balauranan.

Apan alang kang Osmeña nga ang iyang labaw nga gikabalak-an mao ang pagpayuhot og ginadiling drugas, armas ug uban pang illegal nga kalihukan.

“It doesn’t alarm me, if it were guns, drugs or something like that, that I would be concerned, pero kanang ukay-ukay ug vehicles, bahala na sila diha,” sumala sa mayor.

Mas pabor pa gani si Osmeña nga mo-import ang nasod o ang mga pribadong individual og second hand nga mga luhong sakyanan.

“I personally don’t have anything against bringing second hand luxury vehicles as long as they paid taxes, you know, brand new cars are very expensive,”nagkanayon ang mayor.

Alang kang Osmeña makatabang pa sa uban ang maong lakang tungod kay dunay daghang ayuhon sa mga second hand nga mga sakyanan.

“If there are things to be repaired, ilisan ang upholstery, repainting, tuning-up the cars, overhauling, that’s livelihood to local people,”dugang pasabot sa     mayor.

Mipalubad hinuon si Osmeña sa mga tinugyanan sa balaud nga sakmiton ang mga luhong sakyanan nga pinayuhot ug idonar sa dakbayan sa Sugbu.