Magtiayon nadasmagan patay

Magtiayon nga gikan pa sa ilang pagpanimba sa miaging Domingo sa gabii sa Fatima Church sa  Basak, dakbayan sa Mandaue  nangamatay human madasmagi sa naghaguros nga multicab sa ilang paglabang sa dalan duol sa skywalk sa   Basak Police Station.

Ang magtiayon nga nangamatay mao sila si Pedro Pelones Pedrosa, 38, ug Pacencia Alajid Pedrosa, 36, nga pulos nga taga Hermag Village,  barangay Tabok sa maong dakbayan.

Si SPO3 Apolinario Niez, imbestigador sa traffic section sa Mandaue City Police Office (MCPO) nga nahinabi sa Banat News miingon nga gimaneho ni Bebot Ramirez Lara, 31, nga taga Cogon, Pardo, dakbayan sa Sugbu ang multicab nga nakadasmag sa mga biktima.

Nalabay ang asawa ngadto sa daplin sa karsada ug ang bana nga mipilit sa tapaludo sa multicab   napiit dihang nasungag kini sa gikasugat nga holiday taxi nga gimaneho ni June Manlisic Cabor, 37, nga taga Banilad, dakbayan sa Sugbu.

Si PO2 Melvin Pelayo sa Presinto 3 sa Basak Police Station ang nagdali sa paghimog pakisusi dihang iyang nabati ang kusog paglugapak sa nahitabong panagsungag sa taxi ug multicab.

Ang laing taxi nga gimaneho ni Tresonilo Mahinay, 44, nga taga Lower Mahayahay sa dakbayan sa Talisay ang nakasinati usab og kadaut dihang natugpahan sa milupad nga tapaludo gikan sa nagkasungag nga duha ka sakyanan.

Ang mga biktima dali nga gidala sa Mandaue City District Hospital apan pulos kini gideklarar nga patay na nga nahidangat sa maong tambalanan.

Ang duha ka mga drayber nga si Lara ug Cabor kinsa mitahan  kang PO2 Pelayo  human sa maong aksidente ang gitanggong karon sa detention cell sa  Basak Police Station alang sa tukmang lakang nga pagahimuon.