Maestro gilutsa'g warrant tungod sa child abuse

Kanhi maestro sa Badian National High School sa lungsod sa Badian boluntaryong mitahan sa iyang kaugalingon didto sa kapulisan sa lungsod sa Alegria human kini malutsi og warrant of arrest sa korte may labot sa kasong child abuse nga iyang giatubang.

Ang akusado naila sa  ngalan nga si Alfredo Gaballo, 50, minyo, kanhi magtutudlo sa Badian National High School ug molupyo sa barangay Sta. Filomena, Alegria, Cebu.

Gibutyag ni PO1 Euberto Alcazarem sa Badian Police Station dihang nahinabi sa Banat News nga gitawagan na lang sila ug gipahibalo sa kapolisan sa Alegria kabahin sa boluntaryong pag-surrender ni Gaballo niadtong miaging adlaw human kini malutsi og warrant of arrest sa korte.

Subay sa spot report sa kapolisan sa Badian ang kasong child abuse batok ni Gaballo nahitabo kini samtang nagtudlo pa kini sa maong pampublikong tunghaan.

Wala hinuon makahatag og dugang kalambuan ang kapolisan sa Badian kun usa ba ka tinun-an niini ang biktima  ug maoy  misang-at sa maong reklamo. Si  Judge Leopoldo  Cañete sa branch 60 sa Barili RTC maoy mipirma sa warrant of arrest batok sa akusado tungod sa reklamo niining giatubang paglapas sa sec. 5 paragraph B sa Art. 3 sa Akta Republika 7610 kun Anti Child Abuse Act.

Niadtong Sabado sa alas 12 sa udto gi-turn over sa kapolisan sa Alegria ang akusado didto sa Badian Police Station ug kasamtangan karong gibalhug. Ang korte mitakda sa P200,000 nga pyansa kada count  sa child abuse   alang sa temporaryong kagawasan sa akusado.