Gidemalas ang usa ka tulisan human kini suklii sa usa ka babayeng Ruso (Russian) nga turista dihang iyang gisignit ang digital camera niini samtang kini ug higalang babaye nanguha og litrato diha sa gawas sa usa ka fastfood chain sa dalan F. Cabahug sa barangay Kasambagan niadtong Biyernes sa gabii.
Ang nadakpan giilang si Jovencio Erjas, 23, taga dalan T. Villa sa barangay T. Padilla kinsa misuway na unta og sakay sa motorsiklong gimaneho sa iyang kauban apan naabtan.
Ang biktima giilang si Julia Chulkova,21, usa ka Russian nga kasamtangang nag-abang sa Golden Peak Hotel sa barangay Lahug.
Sa imbestigasyon sa Theft and Robbery Section si Chulkova ug higalang si Elena Filipova nga usa usab ka Russian nagpahulagway diha sa maong dapit dihang giduol sa suspek ug gilabni ang camera niini nga nagkantidad og P30,000.
Daling nidagan si Erjas apan ang biktima migukod kaniya hangtud nga kini naabtan dihang nikabayo na sa motorsiklo sa kauban niining si Hendrell Dajudo.
Apan una pa makapadagan og kusog si Dajudo, gibunlot sa biktima ang backpack ni Erjas hinungdan sa pagkatagak niini ug nabiyaan sa misutoy nga kauban.
Dali usab nga midagan ang suspek apan wala kini lung-i sa mga babayeng Ruso hangtud nga nakit-an sa mga traffic enforcers nga sila si Joseph Fredreguilan, Bonifacio Gaviola, Fernando Miñoza ug sa polis sa TRS nga si PO3 Gerardo Fiel hinungdan sa pagkasikop niini.
Dihang girekisa, narekober ang camera sa biktima ug nakuhaan usab kini og usa pa ka paketeng gidudahang may sulod nga shabu gikan sa iyang bulsa.