“Pusher” sa Toledo gipusil sa ulo tipi

Gipusil patay ang usa ka gidudahang tigpayuhot og gidiling drugas  samtang kini  naglakaw  paingon na untang mopauli sa pinuy-anan   sa sitio Baybay Poblacion, siyudad sa Toledo sa  milabay’ng gabii.

Ang biktima naila nga si Bernard Bocanegra 33, molupyo sa nahisgutang lugar kinsa gideklarar nga dead on arrival sa tambalanan.

Gibutyag ni PO3 Gerson Lebumfacil dihang nahinabi sa Banat News  base  sa mga pamahayag sa mga saksi naglakaw ang biktima padulong  sa ila  dihang  kalit lang kining gipusil sa wala mailhing tawo.

Ang biktima nga naka-angkon og samad pinusilan sa luyong bahin sa iyang ulo ang gidali unta pagdala sa  tambalanan apan  patay na kini pag-abot.

Matud ni PO3 Lebumfacil nga gawas nga gidudahan nga tigpayuhot og gidiling drugas ang biktima sa maong lugar duna pa gyud kini pending nga kaso sa korte may labot sa paghupot og armas nga walay lisensiya.

Pagkakaron duna nay saksi ang kapulisan nga gituohang makahatag og dugang inpormasyon sa maong panghitabo apan nagdumili lang una kini paghatag og dugang detalye kabahin niini.

Matud ni PO3 Lebumfacil panagdumot ang gitutokan karon sa ilang nagpadayun nga imbestigasyon nga posibleng maoy motibo sa krimen.