Traffic chief sa Talisay gipapha

Pormal na nga giilisan si SPO1 Joseph Glen Burlas ni Police Inspector Arceliano Bañares isip hepe sa traffic division sa dakbayan sa Talisay.

Bag-o lang si Burlas ug Konsehal Sabeniano Abatayo kinsa Vice Chairman sa Traffic Commission sa Talisay ang gikatahong nagkasumpaki kabahin sa pagdumala sa trapiko.

Si Police Superintendent Romeo Perigo hepe sa kapolisan sa dakbayan nagkanayon nga aron magpabilin ang maayong relasyon sa kapolisan ug siyudad hinungdan nga iyahang gitangtang si Burlas sa pwesto niini.

Ang konseho sa dakbayan ug si Mayor Socrates Fernandez ang miawhag sa pagpabalhin ni Burlas.

Human bawia ni Abatayo sa milabay’ng semana ang mga citation ticket ug temporary operator’s permit nahimong dili na epektibo ang mga polis sa ilang trabaho kabahin sa trapiko ug dili na usab epektibo si Burlas sa iyang posisyon.

Matud ni Perigo nga walay mga kalapasan nga nahimo sa iyang pagpabalhin ni Burlas ug destino diha sa main station nila sa Barangay Poblacion.

Sa laing bahin, si Abatayo sa iyang bahin ang mihimakak nagkasumpaki sila ni Burlas.

Matud niini nga ang nahitabo kabahin lang sa pagpahigayon nila sa ilang mga trabaho.

Base sa taho nga si Abatayo estrikto kaayo sa iyang pagdumala sa tapiko apan matud pa sa Konsehal nga gusto lang niyang palig-onon ang maong departamento aron mahimo kining epektibo diin iyang nasuta nga adunay mga traffic enforcer ang motunghang late sa ilang trabaho.

Si Abatayo mibutyag nga moluwat na unta siya sa iyang katungdanan isip chairman sa TRAFCOM apan si Fernandez ug ang ubang mga sakop sa konseho ang miawhag kaniya nga dili moluwat ug gani ang mayor miluwat og executive order aron siya mapabilin.