Presinto 3 sa Mandaue way nahimo sa pinusilay

Walay nahimo ang kapolisan sa Presinto 3 sa Basak Police Station sa dakbayan sa Mandaue sa nagpinusilay sa miaging gabii nga pundok sa armadong mga batan-on sa barangay Jagobiao, dakbayan sa Mandaue.

Kini ang gipadayag ni SPO2  Edgar Pasaylo nga gikahinabi sa Banat News kagahapon kinsa miingon nga igo na lamang silang namunit sa mga basiyo sa armas sa  unom ka slug sa kalibre 45 ug napulo ka mga kabhang niini.

Matud pa niya nga naukay ang mga lumolupyo sa maong dapit ug nangayo kini og panabang kanila sanglit wala man silay kaugalingong sakyanan, ang ilang  gihimo ang pagtawag sa mobile patrol sa ilang headquarter.

Dugang pa niya nga gihapit na lamang sila sa mga polis sa  Mobile Patrol dihang ilang gitubag ang alarma apan ang nagpinusilay nga pundok nga nagsakay og motorsiklo ang dali nga nakapahilayo.

Ang pundok nga nagpinusilay giila sa mga lumolupyo nga mao sila si Edrel Puno, Regie Ligan, Ivy Abasolo, Camon Limac nga alyas Macmac ug nagpuyo sa maong dapit.

Ang gikapinusilay sa maong pundok mao usab ang pundok ni  Ariel Parcon, 29, Lexhanjec Tampo, 20 ug Persebal Mejias, 18 nga pulos armado ug kalibre .45 nga pistola.(Romeo T. Limpangog)