Giligsan kay maoy nisumbong

Usa ka trabahante sa Lex Mark sa MEPZ II, Basak, dakbayan sa Lapulapu nga nagsakay sa iyang motorsiklo ang  naangol dihang gipadasmagan sa sakyanan sa kauban niya sa trabaho.

Nahitabo  kini kagahapon sa buntag sa dalan Maximo Patalinjug, barangay Pajo, dakbayan sa Lapulapu.

Ang biktima mao si Ronaldo Baclay, 28, nga taga barangay Banilad ug ang suspetsado mao si Alberto Lanticse Reconalia, 27, taga  barangay Looc, dakbayan sa Mandaue.

Si SPO2  Rolito Jumao-as sa homicide section nga nahinabi sa Banat News miingon nga nag-una nga migawas ang biktima gikan sa ilang trabaho ug nagsakay kini sa motorsiklo pauli sa ilang panimalay sa Mandaue.

Ang suspetsado nga nagsunod sa paggawas nga nagluwan sa iyang multicab nga sakyanan ang migukod ug dihang naapsan kalit niining gipadasmagan ug gidaro paingon sa gutter.

Matud pa ni SPO2 Jumao-as nga ang biktima kinsa nabalian sa iyang mga kamot ang nakahigayon pa sa pagdagan pahilayo ug ang suspetsado nga nadakpan ang gitanggong sa bilanggoan.