Kolektor gitulis sa mga nagmaskara

Usa ka lending collector nga gikan naningil sa ilang mga utangan nga kustomer sa bukirang bahin sa lungsod sa Argao ang gi-atngan  ug gitulis sa duha ka mga suspetsado nga nagtaptap sa ilang nawong ug armado og armas ug kutsilyo.

Ang biktima naila nga si Manicel Placi Gealon, 27, program assistant ug collector sa lending firm nga Taytay Sa Kauswagan Incorporated nga nagbase  sa lungsod sa Dalaguete.

Ang nakuha sa mga suspek gikan sa biktima mao ang bag nga itom niini nga dunay sulod nga P9,700.00 nga koleksyon niini, apil na ang iyang pitaka nga dunay sulod nga personal niyang kwarta nga P600.00 og gidala sab ang iyang cellphone nga Sonny Ericson nga mobalor og P3,000.00.

Gibutyag ni PO1 Raymund Pepito sa Argao Police Station dihang nahinabi sa Banat News gikan sa bukirang barangay sa Cansuhi ang biktima sakay sa iyang suki nga habal habal nga gimaneho sa usa ka “Roy” gikan nga naningil.

Apan dihang paingon na unta silang mopauli paghiabot nila sa liko-onon nga dalan sa sitio Malacurong barangay Usmad kalit lang silang gibabagan sa mga suspek.

Ang usa ka suspek matud ni PO1 Pepito kalit nga mition og kutsilyo sa liog sa habal habal drayber samtang ang laing suspek miduol og dayung tion sa armas ngadto sa biktima dungan ang pagkuha sa bag niini nga maoy gisudlan sa iyang koleksyon.

Matud ni PO1 Pepito wala makaila ang biktima sa mga suspek og naglisud sab paghatag og discription tungod kay nagtaptap man pulos sa ilang nawong og maskara.