Nangihi gipusil, patay

Gipusil patay ang usa ka tigulang lalaki nga  migawas sa ilang pinuy-anan aron pagtubag sa sugo sa lawas alas 11:00 sa  nilabay’ng gabii sa Upper Lanao lungsod sa Moalboal.

Ang biktima naila sa pangalan nga si Junnie Veloso 67, ug molupyo sa nahisgutang lugar.

Gibutyag ni PO1 Joeffrey Badilles sa Moalboal Police Station sayo nga natulog ang biktima niadtong Huwebes sa gabii apan nahigmata kini nianang alas 11:00 ug migawas aron sa pagpangihi.

Apan wala magdugay nabati nalang sa mga pamilya sa biktima ang usa ka buto sa armas ug nisunod ang tingog sa biktima nga nangayo og panabang.”

Matud ni PO1 Badilles human sa pagpangayo og tabang sa biktima gisundan pa kini sa duha ka sunod sunod nga buto sa armas nga wala pa matino ang kalibre ug wala na subling nabati ang tingog sa biktima.

Gibutyag ni PO1 Badilles nga ang biktima naka-angkon og tulo ka samad pinusilan sa lain laing bahin sa kalawasan niini nga maoy hinungdan sa iyang hinanali nga kamatayon.