Drayber sa trak nga nakaingon sa kamatayon sa mediaman sikop

Nasikop sa mga sakop sa  Criminal Intelligence Detection Group (CIDG-7) ang usa ka driver nga si Carry Jayson, kinsa maoy driver sa truck nga nadasmagan sa komentarista sa radyo Elly Carungay, diha sa South Road Property.

Ang suspetsadong si Jayson, 46, nga taga Basak dakbayan sa Lapu-Lapu ang kasamtangan karong gitanggong sa CIDG-7 samtang gihikay pa ang mga papeles niini.

Si Jayson, nga niatubang sa mga sakop sa media kagahapong adlawa didto sa buhatan sa CIDG-7 mipadayag nga natingala nalang siya dihang gisikop didto sa opisina sa ilang buhatan human nalutsan sa warrant of        arrest.

Ang warrant of arrest giisyu ni Regional Trial Court Judge Francisco Seville Jr. niadtong Oktubre 31 sa miaging tuig labot sa kasong reckless imprudence resulting to homicide human mamatay si Carungay nga may piyansang P10mil.

Si Jayson, mipasabot  nga wala siya makadawat og order sa korte labot sa maong krimen ug gani padayon siyang nagtrabaho isip driver sa Fast Loader Trucking nga nahimutang sa T. Padilla ning dakbayan.

Gipasabot niini nga atol usab sa pagkadisgrasya ni Carungay, aduna siya’y gibutang nga warning device mga 6 metros ang gilay-on human sa pagkaguba cargo truck.

Nakurat nalang siya sa iyang pagbalik gikan sa Mandaue nga nagkuha og mekaniko nga aduna nay mga police nga nagbantay sa iyang gimanehong truck.

Hinuon ang tag-iya sa Prime Mover Trucking nga Fast Loader Trucking nipasalig kaniya nga tabangan sa maong kaso nga iyang giatubang nga wala gyud siya’y nakitang kalapasan.