Nang-'rape' nga kawani gisuspenso

Samtang padayon pang giimbestigar ang reklamo batok sa duha ka kawani sa city hall sa dakbayan sa Talisay kinsa gipasanginlang mimolestiya sa usa ka job order, si Mayor Socrates Fernandez ang miluwat na og preventive suspension batok sa duha ka suspetsado.

Base sa memorandum nga giluwatan niadtong petsa uno niining buwana, si Fernandez mimando sa hepe sa human resource management nga si Emily Cabrera nga ipaubos sa preventive suspension sulod sa 30 ka adlaw sila si Alberto dela Cuesta ug Lorte Cabrera ug niadtong Lunes mi-epekto ang nahisgutang preventive suspension sa duha.

Matud sa mayor nga ang kamandoan iyang giluwatan tungod sa padayon pang imbestigasyon sa reklamong administratiba sa usa ka job order nga babaye kinsa maoy biktima ngadto sa mga suspetsado.

Ang maong pagkasuspenso ni dela Cuesta ug Cabrera ang gisubay sa Section 21 sa “Administrative Disciplinary Rules on Sexual Harassment Cases” sa siyudad o kabahin sa balaod sa siyudad sa sexual harassment.

Gikataho nga kung mapamatud-an nga sad-an sila si Cabrera ug dela Cuesta posible kining mapalagpot sa katungdanan.

Si Richel Bacaltos, Talisay City Administrator nagkanayon nga ang committee on decorum and investigation kinsa siya maoy vice chairman mihatag sa mga suspetsado og higayon nga makaduso sa ilang tubag ngadto sa komitiba  ug ipaubos pa usab sila sa hearing.

Midugang sab kini nga posibleng mataktak usab gikan sa trabaho ang mga sinumbong kung mapamatud-an ang pasangil batok kanila. (Uban sa report ni Wen Celen)