Suspek pagpatay sa PUJ driver sikop

Nasikop ug gipasakaan na og kaso ang suspetsado nga mipatay sa usa ka PUJ driver human kini pusila niadtong petsa 30 sa milabay’ng buwan didto sa barangay Gun-ob dakbayan sa Lapulapu.

Matud pa ni CIIS Chief, P/Insp. Francisco Baguio nga nahinabi sa Banat News ang nasikop mao si Edgardo Tiano, 29, minyo ug residente sa Sitio Kagudoy, Brgy. Basak dakbayan sa Lapulapu.

Si Edgardo Tiano gisikop human kini positibo nga gitumbok sa tulo ka mga saksi lakip na ang asawa sa biktima nga si Roselyn Jane Ybanez ug duha ka silingan niini nga diha atol sa pagpusil patay sa bana niini nga si Herminihildo Ybanez atol sa gihimong police line-up human kini gipatawag sa kapolisan lakip na ang magsoong mga ig-agaw niini nga si Arnel Tiano ug Albert Tiano.

Apan sa dihang gipasaka ang kaso ngadto sa piskaliya ang magsoong Arnel ug Albert Tiano gipabuhian ni Lapulapu City Assistant Prosecutor Aida Castillo sa dihang wala magkadimao ang mga pamahayag sa duha ka mga saksi atol sa “inquest proceedings” niini ug sa affidavit nga ilang gisumiter ngadto sa piskaliya.

Gumikan niini bugtong lamang si Edgardo ang napasakaan og kasong murder ngadto sa korte gumikan sa hugot nga pamahayag ni Roselyn (asawa sa biktima) nga nagtumbok sa suspetsado nga adunay kalambigitan sa maong kaso.

Kahinumduman nga si Herminihildo Ybanez gipusil patay niadtong milabay’ng Enero 30 ning tuiga sa ilang tugkaran sa dihang mobiyahe na unta sa iyang PUJ sa wala mailhing tawo ug gituhuan nga personal nga panagsungi ang motibo sa  pagpamusil.