Ang pagsubo sa dugang nga edipisyo sa Mandaue City District Hospital maoy nag-unang kalihokan sa ika 7 ka tuig nga anibersaryo sa ospital nga pagahimuon ugmang adlawa.
Ang health officer sa dakbayan kinsa mao usab ang nagdumala sa maong tambalanan nga si Dr. Oscar Quirante nga nahinabi sa Banat News kagahapon maoy mipadayag niini.
Si Mayor Jonas Cortes maoy mangulo sa pagtambong sa maong kalihukan uban usab nila ni Bise Mayor Carlo Fortuna ug mga sakop sa Konseho.
Matud pa niya nga bag-ong edipisyo nga nagbaton og 25 ka mga katre alang sa mga pasiyente maoy nagdugang sa gidaghanon sa madawat nga pasyente nga mokabat nahimong 50 ka mga pasyente niining panahona.
Dugang pa niya ang tipik usab sa mga lawak sa bag-ong edipisyo nga pagasubhan mao usab ang nahimutangan sa laboratoryo ug uban pang mga ekipo niini.
Si Dr. Quirante miingon nga sa kasamtangan anaa pa sa secondary ang classification sa maong tambalanan apan ilang gipaabot ang deklarasyon isip tertiary nga tambalanan.
Kahinumdoman nga ang Mandaue City District Hospital maoy usa sa mga district hospital sa kagamhanan sa lalawigan sa Sugbu nga gitugyan sa lokal nga kagamhanan sa dakbayan sa panahon ni kanhi Mayor Thadeo Ouano.