Nag-bike gisungag sa taxi
Nakabsan sa iyang kinabuhi ang usa ka lalaki diha sa Cebu City Medical Center paglabay sa pipila ka oras human kini madasmagi sa usa ka taxi mga alas 12:45 sa kadlawon kagahapon diha sa may dalan N. Bacalso Ave. corner New Road Mambaling ning dakbayan.
Ang namatay sa tambalanan giila nga si Alberto Maraon, hingkod ang panuigon human wala na makaagwanta sa samad ug bun-og sa nagkadaiyang parti sa iyang lawas.
Samtang ang nakadasmag sa biktima mao ang Ken Taxi, GUP-278, gimaneho ni Teodoro Asanoy, 29, nga taga Lower Linao, lungsod sa Minglanilla.
Sa imbestigasyon sa kapulisan ang biktimang si Maraon nagmaniho kini sa iyang biseklita ug kalit lang kining mitabok diha sa nahisgutang lugar.
Hinungdan nga maayong pagka-igo sa biseklita niini sa taxi nga nagsubay sa maong dalan nga nagpaingon ngadto sa Tabunok.
Human sa maong hitabo ang biktima gidali sa pagdala sa CCMC apan sa paglabay sa pipila ka oras namatay kini.
Samtang ang driver boluntaryo usab nga mitahan sa iyang kaugalingon sa kapulisan.
- Latest
- Trending
