Upat ka mga balay patigayon sa dakbayan sa Sugbu gisirad-an kagahapong adlawa sa demolition team uban sa Revenue Task Force sa siyudad.
Kini tungod sa nahimong kalapasan niini sa section 16, article 5 sa City Ordinance Number 1656 kon City Zoning Ordinance.
Ang upat ka business establishment naglangkob sa Salinas Grill Restaurant, Goodah-Gud, AA Barbecue Restaurant ug Dharra Tapsilog nga pulos nahamutang sa Salinas Drive, Lahug.
Matud ni City Planning Officer Nigel Paul Villarete nga gipadalhan na og notice to comply ang nahisgutang mga balay patigayon apan giingong wala makatuman sa gihatag nga tagal.
Gawas nga walay parking area ang maong mga business establishment, niingon si Villarete nga wala usab kini locational clearance, building permit ug business permit.
Giklaro hinoon ni Villarete nga mahimong maablihan pagbalik ang nahisgutang mga balay patigayon kung makatuman na sa gikinahanglang mga rekisitos.
“Kung magnegosyo ta dinhi sa siyudad, kinahanglang mutuman sab ta sa mga gikinahanglan mo-comply gyud ta sa ordinansa,”sumala ni Villarete.
Ang upat ka business establishment diha sa Salinas Drive maoy unang napasirhan sa dakbayan niining tuiga.
Apan nakasiguro si Villarete nga duna pay ubay-ubay nga mga balay patigayon sa siyudad ang isunod pagsira sa musunod nga mga adlaw.
Na-obserbahan ni Villarete nga daghan sa mga building nga gipangtukod sa dakbayan ang nakahimo og nagkadaiyang kalapasan.
Niingon si Villarete nga kung dili kurihian ang ilang mga sayop, posibling sila maoy isunod pagkandado sa demolition team.
“Malipay man ang City Government nga daghang matukod nga negosyo sa siyudad pero dili man sab mahimo nga bisan asa ug bisan kinsa na lang ang mutukod,”dugang pasabot ni Villarete.
Matod ni Villarete nga ang iyang buhatan padayon muhimo og inspeksyon sa mga establisamento sa dakbayan aron pagsuta kung kini wala bay nahimo nga kalapasan.