Crew sa pumpboat milutaw patay na

Nakit-an na lang nga wala nay kinabuhi og nag-utaw-utaw sa dagat ang usa ka crew sa pumpboat  nga M/B Caliesa didto sa kadagatan sa barangay Maya, lungsod sa Daanbantayan Cebu niadtong milabay'ng adlaw'ng Sabado sa alas 9 sa buntag.

Ang biktima giila nga si Epipanio Monterde, 28, ulitawo ug crew sa M/B Caliesa usa ka pasaheroan nga  pumpboat nga nagbiyahean gikan sa Maya Daanbantayan paingon sa isla sa Masbate.

Gibutyag ni PO3 Dennis Velez sa Daan Bantayan Police Station dihang nahinabi sa Banat News si Kagawad Vidal Mantos sa barangay Maya maoy mireport sa kapolisan kabahin sa patay'ng lawas nga ilang nakit-an nga naglutaw-lutaw sa dagat niadtong Sabado sa buntag.

Subay sa inisyal nga imbestigasyon sa kapolisan nahibaw-an nga gisugo kini sa kapitan nga maoy magbantay sa nag-estambay nila nga motorbanca apan pipila ka oras ang  nakalabay ilang namatikdan nga nawala sa puwesto si Monterde og patay na kining nakit-an niadtong Sabado.

Ang mga kaparyentihan na sa biktima maoy positibong miila kaniya nga nagsul-ob na lang og brief ug halos dili na kaayo maila ang panagway niini.

Gibutyag ni PO3 Velez nga nagpadayon pa karon ang ilang imbestigasyon pagtino kun duna bay nahitabong foul play sa kamatayon niini. (Darrel A. Carumba)