Polis Gireklamo “Namukbok”

Usa ka polis ang gipasanginlang nanghapos og armas sa usa ka drayber sa trak nga iyang gikalalis tungod sa panagsaghid sa ilang mga sakyanan diha sa dalan  General Maxilom Avenue niadtong Biyernes sa gabii.

Ang gireklamong polis mao ang hepe sa Patrol Section sa kapolisan sa  dakbayan sa Toledo nga si SPO4 Jaime Iligan human kini pasanginli ni Isidro Fabillar, 20, taga Kinasang-an Pardo driver sa usa ka trak de karga.

Sa alegasyon ni Fabillar batok kang Iligan, kalit siyang gihapsan sa maong polis sa gigunitan niining armas diha sa General Maxilom Avenue  niadtong Pebrero 1 sa kaadlawon.

Si PO3 Roel Claros sa Fuente Police Station nga gikahinabi sa Banat News miingon nga base sa imbestigasyon ni SPO3 Samsom Go nakapakita og medical certificate gikan sa Cebu City Medical Center si Fabillar pagpamatuod nga kini gihapsan og armas sa maong polis.

Base sa maong blotter ang biktima nagmaneho sa iyang mini- dump truck nga may plakang GED-391 ug pag-abot diha sa nahisgutang dalan naigo niini ang multicab ni SPO4 Iligan.

Diha-diha gikatahong gikanaog siya sa maong polis ug gibukbok sa armas niini hinungdan sa iyang pagreklamo.

Sa iyang bahin, si SPO4 Iligan nga gikahinabi sa Banat News, hugtanong mihimakak sa pasangil ni Fabillar nga iya kining gihapsan og pistola.

Matud pa niini nga gikan sila sa iyang asawa nga si Eufenia ug igsoon sa Ayala dihang nasaghiran sa naghaguros nga mini-dump truck ang ilang gisakyan diha sa may Asilo sa Camputhaw.

Apan imbes nga mohunong gikatahong misutoy ang maong trak hinungdan sa nahitabong ginukdanay tali kanila hangtud nga iya kining naabtan sa dalan General Maxilom Avenue ug gibabagan.

Giangkon hinuon sa maong polis nga miibot siya sa iyang armas ug gipangtiunan sila si Fabillar ug kaubanan niini tungod kay wala man gyud mopatuo kaniya sa pagkanaog sa ilang trak bisan paman sa iyang pagpailang siya usa ka polis.

Hinungdan nga sa iyang kabalaka nga moikyas pag-usab ang trak iya gyung gibunlot si Fabillar gawas sa trak apan wala niya kini dapati.

“Siguro sa kusog nakong bunlot niya kay wala man gyud manaog napakong siguro to pero dili intawon tinood nga akong gisukmag ginamit ang armas,”  napakong lang to seguro madahan police ta unya kita na hinooy mosupak sa pagpatuman sa balaod,” pagpasabot pang Iligan.

Mipadayag si Iligan nga andam siyang moatubang kung dunay reklamo ang maong drayber apan kini iya gyung pabayron sa danyos sa iyang sakyanan.