Cellshop gilungkab

Sobra sa P80 mil ang kantidad sa salapi ug mga butang nga nadala ug giguba sa usa ka wala mailhing kawatan sa milabay’ng semana gikan sa usa ka shop sa TV ug cellular phone sa Barangay Looc, lungsod sa Santander.

Ang biktima nga si Roland Companero, 36-anyos,  ang mitaho ngadto sa kapolisan kabahin sa maong hitabo.

Base sa imbestigasyon sa mga polis nga si Companero dinhi sa dakbayan sa Sugbu dihang nahitabo ang pagpanglungkab sa iyang shop.

Mga alas 5:00 sa hapon sa nahisgutang adlaw pag-abot ni Companero diha sa iyang shop iyang nabantayan nga naguba na ang padlock niini lakip na ang door knob.

Nadala sa kawatan ang P22,700 nga salapi ug passbook sa bangko nga gibutang ilawom sa component.

Samtang ang pito ka TV units nga andam na unta nga i-deliver ngadto sa mga customer ni Companero ang giguba.

Ang maong mga TV naglangkob sa Kolin nga nagkantidad og P14,600; LG nga nagkantidad og P8 mil; Gold Star, P6,700; Daewoo, P6,800; usa ka sharp nga 21 inches, P7,600 ug usa ka unit nga Sony component nga nagkantidad og P18,000.

Lakip usab sa giguba ang usa ka unit sa lop tap NRC nagkantidad og P18,000 ug usa ka unit nga VCD player nga nagkantidad og P1,800.

Sila si Juvelino Buscato ug Segundino Bulburan nagkanayon nga nakita nila si Freddie Jugo ang mianha sa shop ug nahibulong sila tungod kay nagdali kining mibiya sa shop sakay sa usa ka motorsiklo.

Si PO3 Welther Grapa ug PO1 Dionilo Lapera mipahigayon og follow-up nga operasyon ug miadto sa balay ni Jugo para pagpiho sa mga pasangil sa nahisgutang duha ka tanod apan wala kini diha sa ilang balay.

Si Companero ang gikatakdang mopasaka og kaso batok kang Jugo kinsa maoy gituohang suspetsado sa maong hitabo.