Edipisyo Lahug Elem. School tiwason gyud sa

Gipasalig ni Cebu City Hall Education Consultant Joy Augustus Young nga mahuman ang upat ka andana nga school building diha sa Lahug Elementary School.

Ang gipasabot ni Young mao ang 20 ka classroom building diha sa maong tunghaan nga gigastuhan sa kagamhanan sa dakbayan.

Nahimong kontrobersiyal ang katukuran sa nahisgutang school building dihang gipahunong ni  Mayor Tomas Osmeña ang konstraksyon niini.

Kini human usab nasuko ang mayor sa barangay kapitan sa Lahug nga si Mary Ann delos Santos tungod sa gipakatap niini nga flyers diha sa Lahug sa miaging local elections.

Ang flyers nagpahibawo nga ang siyudad ubos sa pamunuan ni Osmeña, giingong walay nahatag nga mga proyekto diha sa nahisgutang barangay.

Nausab ra hinoon ang huna-huna sa mayor human sa pipila ka semana ug gipatiwas ang pagtrabaho sa maong proyekto.

Apan sa miaging pipila ka adlaw gipahibawo ni Kapitan delos Santos nga gihunong na ang trabaho sa school building ug wala tiwasa sa contractor.

Gipasabot hinuon ni Young nga wala undangi ang pagtrabaho sa proyekto kun dili nahuman na ang kontrata sa pagtrabaho niini.

“Wala undangi, humana ang kontrata sa kontraktor, unya kana man gong building sa Lahug, ang atong gi-bid ana mao lang ang structure,” sumala ni Young.

“Ang pasabot sa structure kana lang poste, beam, sawog, pabarog lang ba, unya kita nay motiwas ana aron makadaginot ang siyudad ba,” dugang pasabot sa education consultant.

Nagkanayon si Young nga gitakda na ang pagtiwas ug trabaho sa nahisgutang building aron kini magamit sa maong tunghaan sa umaabot nga tuig tingtungha.

Subay niini, dunay gipadangat nga mensahe ang City Hall Education Consultant ngadto kang Kapitan delos Santos.