Giunay og kawat sa maid

Nahanaw ang mokabat sa P50,000 nga kantidad nga mga alahas ug digital camera nga nagkantidad og P30,00 sa usa ka negosyante sa barangay Jugan, lungsod sa Consolacion nga gituohang gikawat  sa kaugalingong katabang sa miaging  hapon.

Ang biktima mao si Jonathan Tehankee, 29, ug negosyante sa maong dapit ug ang gikatahapan mao si Jenny Ameliano, hingkod ang panuigon, dalaga ug lumad nga taga barangay Catarman sa lungsod sa Liloan.

Si SPO2 Rizalino Aligno nga nahinabi sa Banat News miingong nagbinugtong lamang nga nahibilin sa panimalay sa biktima ang maong katabang sanglit ang tanang sakop sa pamilya didto man sa ilang tindahan sa barangay Poblacion sa maong lungsod.

Matud pa ni SPO2 Aligno nga sa pagpamauli sa biktima ug mga sakop sa pamilya  maoy namatikdan nga nagkatuali na ang iyang mga butang sa sulod sa ilang panimalay.

Dugang pa ni SPO2 Aligno nga nagtinabangay sa pagpangita ang tanang sakop sa pamilya sa maong katabang nga gituohang misibat nga dala na ang maong mga alahas sa biktima.

Si SPO2 Aligno miingon nga nagpadayon karon ang ilang pagpangita sa suspetsado kinsa ilang gituohang wala pa makasibat pahilayo gawas sa dakbayan  sa Sugbu.