2 Ka Tawo Nasikop Sa Entrapment
Duha ka tawo ang gidakop atol sa entrapment operation sa mga sakop sa Regional Anti-Illegal Drug Special Operations Task Group-7 niadtong Huwebes sa gabii human gikatahong misuway og suborno kanila aron pagamyan ang kasong gipasaka batok sa ilang kabanay nga dinakpan.
Ang gipangposasan giilang sila si Washington Oyao alyas Inday ug Janisha Cortez, pulos hingkod ang panuigon. Si Washington igsuon sa dinakpan nilang si Paquito Oyao, samtang anak sa naulahi si Cortez.
Ang duha nga pulos residente sa barangay Marigondon diin madakpi si Paquito niadtong milabay’ng Miyerkules sa gabii atol sa buybust operation sa grupo ni Supt. Marvin Sanchez.
Ang kapolisan nakakuha og duha ka dagkong paketeng may sulod nga gidudahang shabu gikan kang Paquito niadtong tungura subay usab sa giorder nga shabu sa kapolisan.
Sumala pa nga ang duha mihangyo sa kapolisan nga pakubsan lang ang kiha batok kang Paquito bugti sa P100,000 nga ilang ibayad diha mismo sa buhatan sa RAIDSOTG-7.
Human itunol ang 200 ka buok nga tag P500 ngadto sa mga polis daling gidakop ang duha ug gibalhog sa bilanggoan. Kasong paglapas sa Article 212 sa Revised Penal Code ang gikatakdang ipasaka batok kanila tungod sa pagpanuborno og kawani sa gobiyerno.
Si Paquito Oyao dunay nagpatong-patong na nga kasong pulos may kalambigitan sa illegal nga drogas diha sa hukmanan sa dakbayan sa Lapulapu.
- Latest
- Trending
