Wanted napusilan

Napusilan samtang naglingawlingaw og pakig-inom sa iyang mga higala ang usa ka wanted didto sa lungsod sa Compostela, Cebu niadtong Huwebes sa alas 2 sa kaadlawon.

Ang biktima naila nga si Noel Canin Tidoy, 20, ulitawo, molupyo sa barangay Estaca, Compostela.

Gibutyag ni PO1 Necabero Balverde imbestigador sa Compostela Police Station dihang nahinabi sa Banat News nakig-inom ang biktima sa iyang mga higala sa usa ka tindahan sa barangay Poblacion.

Apan nianang pagka alas 2:00 sa kaadlawon nananghid ang biktima nga mogawas ug mangihi apan kalit lang kining giduol ug gipusil sa suspetsado nga naila lang sa angga nga “Taksan.”

Ang biktima nakaangkon og samad pinusilan sa tuo nga bahin sa iyang ulo agi sa kalibre .38 nga armas ug daling gidala sa Vicente Sotto Memorial Medical Center (VSMMC) ug sa paghimo ning balita padayon pa karong giatiman.

Samtang ang kapolisan padayon pang mihimo og follow up operation aron masikop ang suspetsado nga daling misibat human sa hitabo.

Gitug-an usab ni PO1 Balverde nga ang biktima kapin sa tuig nang wanted sa ilang lugar tungod sa kasong murder niini niadtong bulan sa Enero sa milabay’ng tuig.

Matud ni PO1 Balverde nalutsan og warrant of arrest ang biktima apan naglisod sila pagdakop niini tungod kay nagsige kini og tago- tago sa ilang lugar ug dili kaayo magpa-plastar sa publiko.

Dunay mga tabi- tabi nga ang biktima sakop kini sa Alpha Kappa Rho (AKRHO).