Gilugos sa higala gikan sa disko

Giunay og lugos ang usa ka 22 anyos nga dalaga sa iyang silingan ug suod nga higala human sa ilang pagtambung og disco didto sa sitio Bahi barangay Lapaz siyudad sa Bogo niadtong Domingo.

Ang biktima   nagpuyo sa nahisgutang lugar  ug samtang ang suspek giila nga si Vincent Angcot, 24 .

Gibutyag ni SPO3 Edgardo Terol sa Bogo City Police Station dihang nahinabi sa Banat News ang suspek nanghagad og disco sa biktima niadtong Sabado sa gabii.

Alas 2:00 na sa kaadlawon namauli ang suspetsado ug ang biktima luwan sa motorsiklo sa suspek.

Paghiabot nila sa katubhan  kalit lang gipahunong sa suspek ang gimaneho niining motorsiklo ug gisukmag sa tiyan ang biktima, giguyod sa daplin ug didto gipanamastamasan.

Matod ni SPO3 Terol igo nalang sa pagdangop sa ilang buhatan ang biktima pagkaugma niini ug gani nagduha-duha pa unta kini pagpasaka og kaso tungod sa ilang kalisud sa pagpuyo.

Nasayran gikan kang SPO3 Terol nga ang mga ginikanan sa biktima saup sa mga ginikanan sa suspek nga dunay kaugalingong katubhan sa maong lugar.

Kagahapong adlawa ang biktima kauban sa iyang mga ginikanan nagkuha sa medical certificate niini sa Vicente Sotto Memorial Medical Center (VSMMC) dinhi sa dakbayan aron isuporta sa mga dokumento alang sa pagpasaka og kaso niini batok sa suspek nga daling nisibat human sa hitabo. (Darrel A. Carumba)