Polis gitiuna'g pusil iyang videoke gipusil

Usa ka polis nga nanag-iya og videokehan ang nidangop sa kapolisan sa lungsod sa San Francisco human ang iyang vediokehan gipusil sa duha ka wala mailhing armadong tawo niadtong Miyerkules sa kaadlawon nga gibutang diha sa sitio Danawan, Consuelo sa samang lungsod.

Si PO1 Angelito Doylado, residente sa Consuelo ug nadestino diha sa Police Regional Office-7 ug nagpa blotter sa San Francisco Police Station niadtong adlaw'ng Miyerkules.

Segun sa report nga gipadangat sa Cebu Provincial Police Office nagkanayon,  ang videoke ni PO1 Doylado gibutang diha sa sitio Danawan sa caretaker nga si Porperio Impas.

Si Impas miingon nga nakadungog siya'g tingog sa tawo nga saba kaayo duol sa gibutangan sa videoke pipila ka metros ang distansya sa iyang balay.

Daling nanaog si Impas ug iyang gisusi apan maoy iyang nakita ang duha ka mga tawo nga nagtaptap sa nawong ug nition kaniya'g armas.

Tungod sa kahadlok ni Impas midagan  siya pagkataud-taod  iyang nadunggan ang sipang buto sa armas.

Nianang pagka alas 6 sa buntag gibalikan  ni Impas ang videoke apan guba na  ug wala na usab diha ang CD player ingon man ang kuwarta sulod sa  videoke.

Ang kapolisan sa maong lungsod gihimoan na hinuon og pagtagad ang maong hitabo aron mailhan ang responsable niini. (Rey B. Pasaporte)