Notadong pusher sa Lapulapu nadakpan sa RAIDSOTF

Usa ka gipasanginlang notadong drug pusher sa dakbayan sa Lapulapu ang nasikop sa mga sakop sa Regional Anti-Illegal Drugs Special Operations Task Force niadtong milabay'ng gabii diha sa barangay Marigondon.

Ang nadakpan giilang si Paquito Oyao, alyas Kipot ug nabantog usab sa iyang angga nga “Brod” atol sa gihimong buy-bust operation sa grupo ni Supt. Marvin Sanchez.

Ang kapolisan daling misikop kaniya human kini modawat sa P500 nga marked money ug mga pinutol nga papel nga sama sa kwarta nga gibutangan og ultraviolet powder.

Nakuha diha sa iyang posesyon ang duha ka dagkong plastik nga may sulod nga gidudahang shabu nga maoy giorder sa maong mga polis kaniya.

Ang usa ka dakong plastik nga shabu nagkantidad karon og P25,000 sumala pa sa kapolisan.

Si Oyao gikatahong level two drug pusher ug makabaligya kini og 250 gramos ngadto sa usa ka kilo matag semana, giingong nasakop sa teritoryong iyang gisuplayan mao ang tibuok isla sa Mactan lakip na ang mga silingang isla niini ug sa Bohol.

Nasuta usab nga si Oyao dunay upat pa ka mga pending nga kasong may kalambigitan gihapon sa illegal drugs diha sa Regional Trial Court sa dakbayan sa Lapulapu.

Ang suspek nga gitanggong na karon sa kapolisan gikatakdang pasakaan og kasong paglapas sa RA 9165. (Edwin Ian Melecio)