Adik gipusil patay

Gipusil patay ang usa ka giingong drug addict samtang nagkaon sa usa ka karenderya kagahapon sa hapon diha sa Sitio Lawis, Barangay Lorega-San Miguel niining dakbayan.

Ang biktima giila sa mga polis nga si Fabian Rafols, 30-anyos, walay trabaho ug nagpuyo sa nahisgutang dapit.

Matud sa paryente sa biktima base sa interbyu sa GMA-7 Balitang Bisdak nga ang pagpamusil pareha sa estilo sa mga vigilante kay sumala pa nga ang nagpusil nagsul-ob og bonnet ug ang pamarog kay susama sa usa ka polis.

Gikaingon nga si Rafols nagkaon sa karenderya nga tupad sa iyang panimalay kinsa ang nahisgutang kriminal kalit lang miduol ug dayong pusil ngadto sa biktima ug dali kining miikyas human sa maong insidente.

Padayon gihapon ang imbestigasyon sa homicide section sa Cebu City Police Office aron masuta ang  motibo sa maong pagpamusil.

Matud  sa mga polis nga ang biktima nailang adik sa maong lugar ug aduna pa gayud kini’y duha ka warrant of arrests mahitungod sa drugas.

Nakaangkon og upat ka samad pinusilan si Rafols nga maoy gituohang  hinungdan sa iyang kamatayon.(Julie Christy Barredo)