Drayber nabuak ang ulo human nabangga sa poste

Patay diha-diha ang usa ka drayber sa motorsiklo ug naangol ang angkas niini human ang ilang motorsiklo nga gisakyan nibangga sa usa ka poste sa kuryente niadtong Martes sa  gabii diha sa dalan Manalili niining dakbayan.

Si SPO2 Nelson Jaime ang imbestigador sa Traffic Division mibutyag sa Banat News nga ang drayber nga si Elvi Retuela, 23-anyos, ulitawo, taga Sagay Probinsiya sa Negros ang nahabwa ang utok niini gumikan sa kakusog sa pagkadasmag.

Samtang ang kauban niining si Romel Pamaitan, 24, taga Banawa, Barangay Guadalupe ang grabi usab  ang naangkon nga mga samad ug bun-og sa kalawasan ang gikatahong naa pa sa usa sa mga tambalanan ning dakbayan.

Matud pa ni SPO2 Jaime nga si Retuela kusog kaayong nipadagan sa ilang gisakyang XRM Honda  nga motorsiklo nga nagtangag sa plakang JJ-1675 nga nisugat sa dagan sa trapiko diha sa Manalili.

Gumikan sa kakusog sa dagan niini si Retuela wala na makabawi sa manobela hinungdan nga maayong pagka-pilit nila ngadto sa poste.

Dugang pa niini nga si Retuela nagmaneho sa maong motorsiklo nga walay lisensya.