Dispatser gipaulana’g bala tipi

Patay ang usa ka dispatser human kini pusila makadaghang higayon diha sa sudlonong bahin sa Ermita Proper sa barangay Ermita niadtong milabay’ng gabii.

Ang biktima kinsa nakabsan sa kinabuhi pipila ka oras ang nakalabay giilang si Rene Baron, alyas “Atan Pangag” usa ka dispatser ug nagpuyo sa Alaska-Mambaling.

Gitumbok nga mipusil patay kaniya mao si Rexmar Nudalo alyas Rexmar Montemayor, taga Ermita Beach sa barangay Ermita kinsa dali usab miikyas human sa insidente.

Sumala pang PO1 Michael Codaste sa Homicide Section sa pakighinabi sa Banat News ang biktima naglakaw diha sa nahisgutang dapit ug sa pag-abot sa usa ka gamay’ng agianan gisundan kini sa suspek.

Diha-diha gipusil sa suspek sa buko-buko ug sa dughan makadaghang higayon ang biktima ug daling miikyas.

Si Baron gidali og dala sa mga tanod pinanguluhan ni Rogelio Abanto ngadto sa Cebu City Medical Center apan pagka-alas 9:25 namatay kini.

Gisubay na karon sa Homicide Section kung unsay motibo ni Nudalo pagpatay sa biktima apan pasiunang gituuhan may kalambigitan kini sa drogas.