Duha ka polis gibato, 1 angol

Naangol ang usa sa duha ka mga polis human gibato ug gidunggab pa unta apan wala makaigo sa mga lalaking nag-inom daplin sa dalan niadtong Domingo sa gabii diha sa dalan Climaco ug Osmeña St., dakbayan sa Toledo.

Samdan og gamay diha sa agtang si PO1 Aldwin Pepito sakop sa Toledo Police Station ug temporaryong nag-abang og pinuy-anan diha sa dalan Climaco ug Osmeña Street ug PO1 Jonathan Rabayo sakop sa Special Reaction Unit (SRU) ug gidestino diha sa Toledo Police.

Ang gitumbok nga nisuway og dunggab sa duha ka mga polis giilang si Henlito Libre, 28, nga taga Tubod sa nahisgutang siyudad.

Segun sa report, nagkanayon ang mga biktima nagkuyog paingon sa pinuy-anan diha sa nahisgutang lugar.

Ilang naagian ang grupo sa suspek nga nag-inom apan ang suspek kalit nga niatake kanila nga nagdala og gikay (matang sa sanggot) dayong dunggab ngadto kang PO1 Rabayo.

Maayo nalang gani kay nakalihay si Rabayo apan wala sila makalihay sa mga bato nga gilabay kanila sa kauban ni Libre nga niresulta sa pagkaigo sa agtang ni PO1 Rabago.

Hinuon ilang nadakpan ang suspek ug gidala ngadto sa police station.

Matud pang SPO3 Gil Lastimoso, nga ila nang gipasakaan og kaso si Libre kagahapon diha sa Toledo Prosecutors Office.