Dinakpan may 'kalambigitan' sa Lao murder

Ang dinakpan nga si Albert Alfeu Gani alyas Nonoy nga gipasanginlang mipusil sa kanhi hepe sa Customs PEZA Clearance Officer (CPCO) nga si Jason Alcantara adunay kalambigitan sa pagpamanhig patay sa kanhi deputy collector for operations Wewe Lao.

Si Lapulapu city police director Supt. Louie Oppus miingon nga ilang nasota nga si Alcantara ug Lao parehong hepe sa CPCO sa Mactan. Si Alcantara maoy hepe sa maong buhatan atol sa pagpatay, samtang si Lao gikan sa maong buhatan isip hepe.

Apan kining tanan  subayon pa sa kapolisan ang maong mga kalambigitan sa pagpatay sa duha ka opisyal sa customs.

Gumikan niini matud pa ni Oppus nga andam sila sa pakig-coordinate sa mga sakop sa kapolisan sa dakbayan sa Sugbu nga naghawid sa kaso ni Lao sa pamasin nga makatabang usab kini sa pagsulbad sa kaso bisan pa kun  kini anaa na sa korte  ug duna nay gipangtumbok nga suspetsado sa kamatayon ni Lao.

Hangtod karon dili pa ikabutyag ni Oppus kun  kinsa ang gitumbok nga mastermind sa pagpatay ni Alcantara gumikan kay ila pang gipanid-an ang maong suspetsado

Samtang pormal na nga gi-turn-over ngadto sa sala ni Lapulapu City RTC Branch 54  Judge Victor Teves ang  warrant of  arrest ni  Gani human kini masikop didto sa dakbayan sa Talisay sa milabay'ng Sabado ug gipaabot na lang nga kini ibalhin ngadto sa Lapulapu City Jail samtang nag-atubang kini ug kasong murder ngadto sa korte.