5-Anyos Gigulgol Sa Inahan

Gitanggong diha sa  kapolisan sa dakbayan sa Talisay ang usa ka inahan nga miunay sa pag-gulgol sa liog sa iyang singko-anyos nga anak nga lalaki gamit ang usa ka sanggot niadtong Biyernes sa  gabii diha sa usa sa mga barangay sa dakbayan sa Talisay.

Si PO1 Francisco Gorosin sa Talisay Police Station kinsa maoy mipahigayon sa imbestigasyon   mibutyag kagahapon sa Banat News nga gikatahong na-nervous breakdown ang suspetsado maong giunay niini sa paggulgol ang iyang anak.

Ang biktima kinsa nakaangkon og samad sa liog  daling gidala sa Talisay District Hospital apan tungod sa kahimtang niini gibalhin sa Vicente Sotto Memorial Medical Center niining dakbayan ug mikuyog pa ang inahan sa maong bata sa paghatod ngadto niini sa tambalan. Matud ni Gorosin nga ang bana sa suspetsado mibutyag ngadto kanila nga ang doktor sa nahisgutang tambalanan nagkanayon nga na-nervous breakdown ang iyang asawa.

Si Gorosin mibutyag usab nga sa dihang iyang giimbestigar ang suspetsado sa rason sa iyang pag-unay og gulgol sa liog sa iyang anak motulibagbag ang mga tubag niini, una “gikabuhi siya” sunod “tungod sa kawad-on”.

Si PO2 Jaime Abellana, jailer sa detention cell nga nahimutang sa City Hall  mibutyag sa Banat News kagahapon nga ang suspetsado gilahi nila og selda tungod kay manghasi kini og managmal sa ubang mga priso.

Si Abellana nagkanayon nga ang mga kaubang priso sa suspetsado mihangyo ngadto kaniya nga ipalabay ang ilang mga tubig imnonon sa kabalaka nga mapusnga unya sila kun ihuwad kini sa suspetsado ngadto sa ilang nawong panahon nga mahinanok sila sa pagkatulog.

Ang hepe sa kapolisan sa dakbayan  Supt. Romeo Perigo nagkanayon kagahapon sa Banat News nga pasakaan gyud og kaso ang maong inahan apan gihuwat pa nila ang bana niini aron makuhaan og affidavit.

Matud sa hepe nga kun dili moanha sa ilang buhatan ang bana sa suspetsado iyaha kining ipatawag aron dili sila mabasol kung ugaling ilahang buhian ang suspetsado.

Si Perigo midungag nga kun mapasaka gyud ang kaso ang korte na maoy mohukom kung ipahiling ba og doktor ang maong inahan ug ang doktor na usab ang modeterminar kun  aduna ba kini kadaot sa pangisip.