Cordova taas og latason – Rep. Garcia

Haum kang Mayor Adelino Sitoy nga mahimong kongresista nga gitanyagan ni Mayor Tomas Osmeña isip  hulip kang South District Congressman Antonio Cuenco kinsa motapos na sa iyang katapusang termino sa 2010   sanglit banggiitan kining abogado ug taas na og kasinatian.

Kining maong tinguha ni  Osmeña  maisip lamang nga damgo nga lisod matuman sanglit ang lungsod sa Cordova mahimo  na man lang nga barangay sa dakbayan sa Sugbu.

Matud pa ni Cebu 3rd District Congressman Pablo John Garcia nga taas ang proseso sa pag-usab sa usa ka lungsod ngadto na nga mahimong barangay ug itipon ngadto sa laing mga Local Government Unit.

Gipasabot ni   Garcia nga ang proseso magsugod sa pagpanday og balaod sa kongreso ug hangtod na sa mga senador ug kun makalusot adto kini ipadala sa presidente.

Dugang pa niya nga maglalis pa ang  mga kongresista sa Ubos Balay Balaoranan ug laing panaglalis na usab nga mahitabo sa paghidangat sa maong balaodnon didto sa Senado.

Kon kaaprobahan sa bicamiral committee hearing  Senado ug kun mahuman ang maong proseso maoy himoon atol ang halapad nga konsultasyon sa katawhan sa Sugbu hangtod nga mahingpit kining balaod.

Si  Garcia miingon nga gawas sa konsultasyon sa publiko maoy duna na pud  plebisito nga pagasalmutan sa tanang lumolupyo sa tibuok lalawigan sa Sugbu.

Gitataw niya nga dili lamang ang Cordova makabotar sa plebisito kun dili apil usab ang  mga lumolupyo sa dakbayan sa Sugbu sanglit sa pagdugang og barangay lakip usab sila ang maepektuhan niini. (Romeo T. Limpangog)