Drayber Gipatay Sa Agalon

Patay ang usa ka 45-anyos nga family driver human kini pusila sa iyang agalong lalaki niadtong Biyernes sa gabii diha sa sitio Mahayahay, barangay San Isidro dakbayan sa Talisay.

Ang biktima giila sa mga polis nga si Francisco Egos, lumad nga taga barangay Tulik lungsod sa Argao, nagtrabaho isip family driver sa pamilya sa suspek nga si Joseph Sanchen Bareta, 35, ug operation manager sa usa ka custom brokerage sa dakbayan sa Mandaue.

Si Egos wala na makaabot nga buhi sa Chong Hua Hospital gumikan sa samad pinusilan diha sa iyang buko-buko, tiyan ug walang abaga. Samtang daling miikyas ang suspek human sa hitabo.

Si PO1 Erwin Carbonquillo kinsa uban ni PO3 Joel Rosales, mga polis sa Talisay nga mipahigayon sa imbestigasyon sa hitabo mibutyag sa Banat News nga usa sa mga anggulo nga ilang gisubay mao ang selos.

Matud ni Carbonquillo nga sa wala pa mahitabo ang insidente si Bareta wala motungha sa trabaho ug kini nag- inom gikan sa buntag hangtud pagka-alas 6:00 sa gabii sa maong adlaw human sila magkabangi sa iyang asawa.

 Si Danny Boy Villacillo, 23, walo ka buwan na nga nagtrabaho sa pamilyang Bareta isip handler sa manok sa suspetsado ang nakasaksi sa maong hitabo.

 Si Villacillo mibutyag kagahapon sa Banat News nga mga alas 10:35 sa gabii niadtong Biyernes siya ug si Egos namahuway na diha sa ilang kwarto diha ubos nga bahin sa balay.

Nanaog si Bareta kinsa nakainom na og ilimnong makahubog gikan sa taas ug nanghagad kanila og inom apan mibalibad si Egos tungod kay gisubawan kini.

Matud pang Villacillo nagyawyaw si Bareta apan kini gitumong ngadto sa biktima. Si Egos nga wala ganahi sa iyang nabati migawas sa balay ug nagbitbit na og bag nga gisudlan sa iyang mga sapot ug nagpaabot nalang sa amahan ni Aleli nga asawa sa suspek una pa kini mopauli.

Apan dihang nakit-an kini ni Bareta gisita siya niini ug gipugngan nga dili papaulion, bisan si Aleli kinsa nakadungog sa kabanha diha sa ubos mikanaog ug miapil og pugong sa biktima ug huwaton nalang ang ilang amahan.

Matud ni Villacillo nga samtang nagpaabot diha sa garahian si Egos nagkatinubagay  ang biktima ug ang suspek ug diha-diha mibunot og pusil si Bareta ug gipusil si Egos sa buko-buko dihang nakaluhod si Egos atubangan ni Bareta gikatahong giusban kini og pusil diha sa tiyan niini ug sa walang abaga.

Si Villacillo midungag nga sa maong hitabo nakuyapan ang ilang among babaye ug dali nila kining gitabang ingon man si Egos aron madala sa tambalanan.