Naghikog kay gibiyaan sa pamilya

Nadugta nga nagbitay ang patay’ng lawas sa usa ka bana nga naghikog human kini biyai sa iyang asawa ug tulo ka anak diha sa Sitio Kalubihan Barangay Pajac dakbayan sa Lapulapu sa milabay’ng adlaw.

Ang naghikog mao si Arcadio Abong Simeni, 30,   residente sa maong dapit ug usa ka mekaniko.

Base sa imbestigasyon ni SPO1 William Homoc ug PO3 Frederick Eslit nasayran nga gibanabana nga upat ngadto sa lima na ka adlaw nga nagbitay si Simeni gamit ang usa ka pisi nga gihikot sa iyang liog.

Matud pa ni Jimmy Auditor silingan ni Simeni naaghat siya pagtaho ngadto ni Pajac Barangay Kapitan Jimmy Ybañez gumikan sa kabaho sa maong dapit nga sa pagduda naa sa sud sa panimalay ni Simeni nagagikan.

Gumikan niini si Kapitan Ybañez mitaho kini sa kapolisan ug sa dihang giablihan ang panimalay ni Simeni napalgan kini nga nagbitay na sa lawak niini ug hapit na madugta ang lawas niini.

Matud pa ni Auditor nga katapusan nilang nakita si Simeni niadto pang milabay’ng semana human nga nagkalalis ang magtiayon.

Human sa maong panaglalis si Raquel (asawa ni Simeni) ug ang tulo niini ka mga anak milayas sa ilang panimalay ug sukad niadto wala na nila igkita si Simeni nga migawas ug misud sa iyang panimalay.

Nagduda ang kapolisan nga kasagmuyo sa paglayas sa iyang asawa maoy nagtukmod ni Simeni sa paghunos sa iyang kinabuhi.

Matud pa ni SPO1 Homoc wala silay nakitang foul play sa kamatayon ni Simeni, apan ila gihapon kini ipaubos sa autopsiya sa pagsiguro sa gikamatay sa biktima.