10 police unit pasidunggan ni Razon karon

Pasidunggan karong adlawa ni Police Director General Avelino Razon, Jr. ang  police units sa Central Visayas usa na niini ang Cebu City Police Office nga napiling Best City Police Office of 2007, mga opisyal, ordinaryong polis ug mga non-uniformed personnel sa regional level.

Si Razon nga maoy pinasidunggang dinapit sa selebrasyon sa PNP Day karong adlawa nga diha himuon sa Police Regional Office-7 maoy motunol sa mga pasidungog.

Ang napulo ka mga police units nga makadawat og pasidungog mao ang Negros Oriental Provincial Police Office isip Best Provincial Police Office; CCPO isip Best City Police Office; Dumaguete Police Station isip Best Police Station; Valencia Police Station isip Best Municipal Police Station; 705th Provincial Mobile Group maoy napiling Best Provincial Mobile Group; Cebu Provincial Police Office isip Best Women and Children             Protection Desk (Urban Category).

Samtang napili usab nga Best in Women and Children Protection (rural category) ang Compostela Police Station; Regional Communication and Electronics-7 maoy napiling Best National Support Unit for Administration ug ang Regional Criminal Investigation and Detection-7 maoy napiling Best National Support Unit for Operation.

Lakip sa hatagan og pasidungog mao si Sr.Supt. Drusillo Bolodo isip Best Senior Police Commissioned Officer for Operation, Sr. Supt. Edward Carranza sa Comptrollership Division isip Best in Senior Police Commissioned Officer for Administration ug Sr. Insp. George Ylanan isip Best Junior Police Commissioned Officer; pasidunggan usab sila si SPO1 Errol Benida sa Bindoy Police Station sa Negros Oriental isip Best Senior Non Commissioned Officer ug PO1 Ronelon Reveche sa Regional Mobile Group-7 isip Best Junior Police Non-Commission Officer.

Samtang duna say walo ka mga tawong dili mga polis ang hatagan og special awards tungod sa ilang natampo sa komunidad ug sa kalamboan sa Central Visayas.

Ang maong kalihukan gihimo tumong sa pagsaulog sa ika-17 ka tuig gikan sa katukuran sa PNP diin matag tuig panid-an sa mga kadagkoan sa rehiyonal nga buhatan sa PNP ang tanang ginsakupan sa ilang maayong nahimo.

Si Sr. Supt. Patrocinio Comendador, director sa CCPO mitug-an nga ang pasidungog sa CCPO nakab-ot dili tungod niya kundili tungod sa paningkamot sa iyang mga sakop.