Ombuds mosusi sa kasosa CICC

Mopahigayon og imbestigasyon ang Ombudsman Visayas may labot sa kontrata tali sa kagamhanan sa Probinsya sa Sugbu ug WT Construction Incorporated aron pagsuta kun duna bay mga opisyal sa kapitolyo ang nalambigit sa anomalosong transaksiyon.

Gibutyag ni Deputy Ombudsman for the Visayas Pelagio Apostol nga mopahigayon og fact finding investigation ang ilang buhatan may labot sa maong transaksiyon human nisang-at og pormal nga reklamo ang WT Construction ngadto sa korte nga naningil og P261 milyones ka pesos sa bayranan sa kapitolyo kabahin sa dugang nilang pagtrabaho pagtiwas sa CICC nga gigamit sa nilabay’ng 12th  Summit.

Giklaro hinuon ni Apostol nga dili maka-apektar ang ilang himuong pakisusi sa nagpadayong imbestigasyon sa pending nga mga kaso may labot sa reklamo  sa  gipasangil nga kurapsiyon sa katukoran sa CICC.

Apil sa susihon sa Ombudsman Visayas ang taho nga walay kontrata ang kapitolyo ug ang kontraktor dihang gipatiwas og trabaho niini ang maong convention center.

Giklaro hinuon ni Apostol nga dili nila hilabtan ang aspeto may labot sa pagpaningil og bayad sa kontraktor ngadto sa probinsya tungod kay nasang-at na kini karon sa korte.

Ang kagamhanan sa probinsya sa Sugbu pinaagi sa abogado niini nga si Rory John Sepulveda mipadayag nga dili obligado nga mobayad ang kapitolyo tungod kay walay kontrata tali sa kontraktor alang sa maong dugang gimbuhaton pagtiwas sa konstruksyon sa CICC.