Bata na-bulldoze, nalubong sa yuta

Patay na nga napalgan ang usa ka 2-anyos nga batang babaye human kini ma-bulldoze sa bulldozer didto sa Mandaue Reclamation Area kagahapon sa hapon.

Ang biktima nailhan nga si Aiza Manso, residente duol sa dapit nga nahitaboan.

Ang drayber sa buldozer nailhan sa kapolisan nga si Oscar Arizo Jr., 27, ulitawo ug lumad nga taga Catmon ug nagtrabaho sa F.F. Cruz Construction isip operator sa bulldozer.

Base sa imbestigasyon ni PO3 Joselito Catabas sa Traffic Division sa Mandaue City Police Office, nasayran nga samtang nag-bulldoze og mga nagpundok nga yuta si Arizo wala siya makakita sa bata nga naapil sa pag-bulldoze.

Matud pa ni Arizo nga nahinabi sa Banat News nga gisugo siya sa management sa F.F. Cruz sa pag-bulldoze sa mga waste materials nga nagpundok sa maong dapit ug sa dihang padayon siya sa iyang gimbuhaton kalit lamang siya gipahunong sa mga tawo gumikan sa usa ka bata nga nawagtang.

Sa dihang ila kining giukay sa yuta didto na nakita ang bata sa ilawom nga wala nay kinabuhi.

Gidali ang bata sa pagdala sa Mandaue City Hospital apan gideklarar kining patay na sa mga mananambal.

Samtang si Arizo dali nga mitahan sa kauagalingon sa Traffic Division sa Mandaue ug kasamtangan nga gikustodiya sa kapolisan.

Si Edna Manso, iyaan sa bata, miingon nga sila na lang ang nag-atiman sa bata human nga ang mga ginikanan niini pulos nabilanggo sa New Bilibid Prison sa Muntinlupa gumikan sa mga kaso nga ilang gikalambigitan.

Wala hinuon masayod si Manso sa kaso sa ginikanan ni Aiza.

 Si Manso nagkanayon nga uwahi nilang nakita ang bata nga nagduwa pa apan sa dihang kalit kini nga nawala, wala sila magdahom nga didto kini mapalgi ilawon sa yuta nga gi-bulldoze sa bulldozer sa F.F. Cruz nga gimaneho ni Arizo.

Si Arizo nagkanayon nga andam ang kompaniya nga moabaga sa galastuhan sa pagpahimutang sa patay’ng lawas sa bata.