Midaog sa Sinulog gihataga'g salapi

Pormal nga gitunol ni Gobernador Gwendolyn Garcia ang gisaad niining cash incentive ngadto sa mga lungsod nga nidaug sa Sinulog Mardigras niadtong Domingo.

Kagahapon sa buntag gitunol ni  Garcia ang P100mil  nga cash  ngadto sa mga opisyal sa lungsod sa Alcoy pinangulohan ni Mayor Nicomedes Delos Santos human nahimo kining kampyon sa Sinulog Based Category.

Samtang laing P50 mil  nga tseke  ang gitunol sa gobernador ngadto sa lungsod sa Carmen pinangulohan ni  Bise Mayor Sonia Pua human kini modaug isip  Best in Costume ug 2nd placer sa Free Interpretation Category.

Ang lungsod sa Carcar pinangulohan ni Mayor Patrick Barcenas  ang nakadawat usab kini og P25 mil  nga cash incentive gikan sa Kapitolyo human modaug isip 4th placer sa Free Interpretation Category.

Nunot niini gipasigarbo sa gobernador ang gipasiugdahan niini nga "Suroy-Suroy sa Sugbo" nga maoy nakamugna og lain laing mga festival sa kalungsoran aron pagpasikat  sa ilang tagsa tagsa ka mga produkto ug kaugalingong kultura.

Gidayeg sa gobernador ang maayong  nabuhat sa mga contingent sa maong mga lungsod sa nilabay'ng Sinulog Mardigras nga nakatampu og daku sa kalampusan sa popular nga selebrasyon.

Nasayran nga si Gobernador Garcia apil sab sa nisayaw atol sa Sinulog isip lead dancer sa Provincial Government nga guest contingent niadtong higayuna.