Wala mohata'g balato gipatay

Patay ang usa ka lalaki nga wala mohatag og balato sa 60-anyos nga estambay  human gitusak-tusak og kutsilyo atol sa gipahigayong tigbakay niadtong milabay'ng adlaw diha sa Plaza Housing sa barangay Busay.

Nakaangkon og walo ka mga samad dinunggaban sa kalawasan ug wala na kaabot nga buhi sa Cebu City Medical Center ang biktima nga si Marlon Senerpida, 30, residente sa NHA, sa samang barangay.

Samtang dali usab nga miikyas ang suspek nga si Luncio Dayap,  60, estambay ug residente sa Upper Laguerta sa sama gihapong barangay kinsa mag-sideline panghakot og balas diha sa maong dapit.

Sa imbestigasyon ni PO3 Buenaventura Ursaiz, Jr. sa Homicide Section una pa ang pagpanunggab gisumbag sa kaubang hubog sa suspek ang biktima tungod kay  midumili kini paghatag og kwarta nga iyang gipangayo.

“Niduol lagi ning suspek sa biktima kay mangayo og balato sa biktima kay tigbakay man to, unya kay wala mohatag mao to nagubot,” asoy pang Ursaiz sa Banat News.

Ang biktima kasamtangang nag-inom uban sa mga higala nianang tungura dihang miduol ang suspek kinsa nakainom na usab ug nangayo kaniya og pang-inom apan midumili paghatag ang biktima hinungdan sa mainiton nilang panaglalis.

Diha-diha kalit nga gisukmag sa kauban ni Dayap sa nawong si Senerpida apan dihay mga tawong kalmado pa ang ulo nga daling miulang kanila ug napugngan ang kaambola.

Diha-diha mipauli ang biktima aron magpatabang sa iyang uyoang giila lang sa pangalan nga Amay ug sa ilang pagbalik gikomprontase nila ang grupo sa suspek kabahin sa pagpanumbag nila sa biktima.

Apan ang suspek daling mibunot og kutsilyo dayong hansak makadaghang higayon sa biktima dayon naglumba og pangikyas palayo sa dapit samtang daling gidala sa tambalanan ang biktima ug gideklarar nga dead on arrival.